ზაფხულის ცხელი დღეების საინტერესოდ გასატარებლად სულაც არ არის საჭირო ქალაქგარეთ გასვლა. თქვენი შვილებისთვის სახალისო და შემეცნებითი აქტივობები თბილისშიც შეგიძლიათ იპოვოთ. დღეს ჩვენს ფავორიტ აქტივობებს წარმოგიდგენთ: საზაფხულო აქტივობები

საზაფხულო აქტივობები

საკუთარ  შვილზე დაკვირვებამ, რომელიც ერთ მშვენიერ დღეს კომპიუტერის ეკრანთან საბოლოოდ ჩაქრა, ნინო ლაღიძეს უბიძგა შეექმნა ისეთი აქტივობების ნაკრები, რაც სხვადასხვა ასაკის ბავშვს აიძულებდა ეკრანს მოშორებოდა. ასე გაჩნდა „ლიმპოპო“, როგორც მულტდისციპლინური,საბავშვო-საგანმანათლებლო სერვისების მთელი ნაკრები, რომელიც მოიცავს მომსახურების ფართო სპექტრს: გრძელვადიანი ტრენინგები, ექსკურსიები, სათავგადასავლო ტურები, საველე ექსპედიციები და დიდი თამაშები.

სერვისების უმეტესობაში ინტეგრირებულია სპორტული, სათავგადასავლო, პიროვნულ ზრდაზე ორიენტირებული სავარჯიშოები. პროგრამებს უძღვებიან აკადემიური სექტორის მოქმედი მკვლევარები, გამოცდილი ტრენერები და ინსტრუქტორები.

“უბუნიფუ უპავუ” ასე ქვია თამაშს, რომელზეც ლიმპოპო 8-11 წლის ცნობისმოყვარე ბავშვებს იწვევს. 10 ივლისს ბავშვებს შესაძლებლობა მიეცემათ სხვა ბავშვებთან ერთად ეროვნულ ბოტანიკურ ბაღში უბუნიფუს მიერ მოწყობილი გამოცდები გადალახონ. 15 ივლისიდან კი 5-8 წლის პატარებს ლიმპოპო ლოკოკინებთან სამეგობროდ ბოტანიკურ ბაღში დაელოდება პროგრამაზე – “ჰეი, ვინმემ, გამიყოლეთ მსოფლიოს სანახავად”.

ქალაქის ტურები შვილების მიერ ინსპირირებული კიდევ ერთი წამოწყებაა. ამ გადასარევი წამოწყების ორგანიზატორები ხშირად აწყობენ საინტერესო ტურებს თბილისში, ან მსუბუქ ლაშქრობებს თბილისთან ახლოს, ბულბულების ჭალასა თუ სამშვილდეში. საბავშვო ტურები ძირითადად 5-10 წლის ბავშვებისთვისაა განკუთვნილი, ვისაც ეზო აღარ აკმაყოფილებს და მეტის შეცნობის სურვილი აქვს. შესაბამისად, აქტივობებიც მორგებულია ამ ასაკის ბავშვების ფიზიკურ შესაძლებლობებსა და ინტერესებს.

საშიში ამბების მოყვარელ ბავშვებს “ქალაქის ტურები” ფარნებით საშიში ამბების ტურში იწვევს. ტური არც იმდენად საშიშია, რომ პატარებმა ღამით ვერ დაიძინონ. ეს ინტერაქტიული ექსკურსია-თამაში ფანტაზიის გასაღრმავებლადაა. 6-11 წლის ბავშვებს ტურის განმავლობაში შესაძლებლობა ექნებათ გაეცნონ ქართული მითოსის გმირებს. ფანტაზიას კი, სიბნელეში ფარნების შუქზე დადგმული ჩრდილების თეატრი, კატებისა და “შავი ხელის” ძებნა გაუღვივებთ.

“ქალაქის ტურების” კიდევ ერთი პოპულარი ტური განძის მაძიებლებისთვის არის განკუთვნილი. სერნობისას ბავშვები მათთვის გასაგებ ენაზე მოისმენენ ამბებს თბილისზე, მეფეებზე, რაინდებზე, აქ მცხოვრებ ადამიანებსა და მათ წეს-ჩვეულებებზე. ქალაქის რელიეფიდან გამომდინარე, განძის ტური ბევრად დინამიურია და ბავშვებს რამდენიმე აღმართ-დაღმართისა და ქუჩა-კიბის გავლა უწევთ. ამიტომ, ბავშვები ერთი მხრივ ფიზიკურადაც არიან დატვირთულები.

თუ დრო არ გაქვთ, რომ ამ საინტერესო ტურებში გაჰყვეთ შვილებს, მაი ნენის დროებითი ძიძები დაიხმარეთ. სანდო ადამიანის დაჯავშნას ჩვენს ვებგვერდზე მარტივად შეძლებთ.

თუ დაგაინტერესათ კიდევ რით შეგიძლიათ ბავშვები ამ ზაფხულს დააკავოთ, მაშინ არ გამოგრჩეთ ჩვენი საზაფხულო ბანაკების ბლოგი.

გაითვალისწინეთ, რომ სანამ რჩეულ ბანაკში გაუშვებთ ბავშვს, გადაამოწმეთ კოვიდთან დაკავშირებული უსაფრთხოების ზომები, რომელსაც თქვენ რჩეული პროგრამა გთავაზობთ.